«Organismo Vivo» chega este venres ao CIMIX de Narón

Poesía, fotografía, videocreación e experimentación visual conflúen en «Organismo Vivo (Cartografía dunha conciencia en transformación)», a nova exposición de SØJĒ POLCÆM que poderá visitarse desde este venres, 18 de setembro, no Museo CIMIX de Narón.

A mostra reúne diferentes vertentes da creación do artista nun percorrido que explora cuestións relacionadas coa identidade, a condición humana, a memoria e o papel da arte nun contexto marcado polos cambios tecnolóxicos. Xunto ás obras visuais, o público atopará poemas, imaxes, videopoemas e pezas vinculadas á reflexión filosófica.

En lugar de seguir unha orde cronolóxica, a exposición busca amosar tamén os procesos e ideas que acompañaron a creación das diferentes pezas, establecendo un diálogo entre as obras e os distintos espazos do antigo Muíño de Xuvia.

Detrás do nome artístico SØJĒ POLCÆM atópase un creador nacido en Ferrol en 1966. Formado inicialmente en Delineación Industrial e cunha traxectoria profesional ligada á antiga Bazán, actual Navantia, desenvolveu de maneira autodidacta o seu interese pola poesía e a filosofía.

En 2022 adoptou o seu actual nome artístico e iniciou o proxecto dixital O Mundo Segundo SØJĒ POLCÆM. A súa primeira exposición chegou en 2024 na galería DGD de Mallorca.

A inauguración de «Organismo Vivo» terá lugar este venres ás 12:00 horas no Museo CIMIX e contará coa presenza do propio artista. A exposición permanecerá aberta ao público ata o 1 de outubro.