Bombeiros e sanitarios practican rescates en accidentes en Narón

Sabela Arredondo García | 23/09/2026

Vehículos envorcados, vítimas atrapadas e diferentes escenarios de accidentes de tráfico forman parte das prácticas que se desenvolven esta semana en Narón para mellorar a coordinación entre bombeiros e persoal sanitario de urxencias.

Nos exercicios participan 16 bombeiros do SPEIS de Narón e 13 profesionais sanitarios de Ferrolterra, que traballan con vehículos colocados en diferentes posicións para recrear posibles situacións ás que poderían enfrontarse nunha intervención real.

Cada simulación divídese en tres fases. Primeiro realízase unha valoración inicial do estado da vítima e das condicións do accidente, posteriormente procédese á excarceración da persoa atrapada e, finalmente, lévase a cabo a súa extracción do vehículo.

Un dos aspectos nos que se centra a formación é a denominada «hora de ouro», un concepto empregado en emerxencias para destacar a importancia dunha atención rápida e coordinada durante o período inicial tras un traumatismo grave.

Durante as prácticas tamén se traballa na coordinación entre bombeiros e sanitarios, na manipulación segura das vítimas, na organización das diferentes zonas de intervención, na triaxe e no emprego dunha terminoloxía común entre os servizos implicados.

Para recrear distintos tipos de sinistros, os vehículos utilizados nos simulacros colócanse sobre as rodas, de lado ou completamente envorcados. Os coches empregados nos exercicios foron cedidos por Desguaces do Noroeste.