Trasnos, dragóns e cabaleiros tomarán Freixeiro co regreso do Mercado Medieval de Narón

Sabela Arredondo García | 13/07/2026

Trasnos, dragóns, cabaleiros e criaturas fantásticas tomarán o Parque do Río Freixeiro do 16 ao 19 de xullo nunha nova edición do Mercado Medieval de Narón. Durante catro días, o recinto cambiará de época entre antigos oficios, campamentos, obradoiros, pasarrúas e espectáculos en directo.

Todo comezará o xoves 16 ás 18:00 horas, coa apertura dos postos, as exposicións e o campamento medieval. Treefolk, Luisete e Gandulf encargaranse de poñer música e animación ás primeiras horas dun mercado que permanecerá activo ata as 22:30.

Xa o venres, desde as 11:00 horas, cabaleiros e artesáns compartirán espazo co público a través de demostracións e actividades. Pola tarde chegará boa parte da programación escénica, con pasarrúas e propostas de compañías como Grus-Grus, Teatro Infinito, Fantabulosía, Artimaña, Gaeloc e Bufón Rojo.

Monicreques, circo e personaxes fantásticos marcarán a xornada do sábado. O momento máis espectacular está previsto para as 23:30 horas, cando dragóns, lume, música e pirotecnia se unirán nun número especial protagonizado por Treefolk, Artimaña e Bufón Rojo.

Para o domingo quedará a despedida. Desde as 11:00 horas continuarán as actividades polo parque antes do gran pasarrúas das 21:45 horas, que reunirá as compañías participantes nun peche con música, danza, lume e números aéreos.

Fóra dos espectáculos, tamén haberá espazo para probar o tiro con arco, visitar a escola de cabaleiros ou coñecer máis de preto os obradoiros de coiro e moedas. Pintacaras e atraccións infantís completarán unha oferta pensada para diferentes idades.

Entre as novidades desta edición figura a ampliación do obradoiro de talla en madeira do artesán Aitor, que alcanzará os nove metros.