Ares reunirá xogadores de todas as idades nun torneo de xadrez

Sabela Arredondo García | 20/10/2026

Pequenos e maiores terán unha cita co xadrez o próximo domingo 25 de outubro no Casino de Ares, onde se celebrará a décima edición do Torneo de Xadrez «Concello de Ares». A competición reunirá participantes de diferentes idades e contará con sete roldas ao longo da xornada.

Desde as categorías Sub 10, Sub 12, Sub 14, Sub 16 e Sub 18 ata Sénior e Veteráns, esta última para maiores de 60 anos, os xogadores poderán poñer a proba a súa estratexia e habilidade sobre o taboleiro.

Organizado polo Círculo Ferrolano de Ajedrez, coa colaboración da Escola Ferrolá de Xadrez e o patrocinio do Concello de Ares, o torneo será válido para o ELO rápido, o sistema de puntuación que permite medir o nivel competitivo dos participantes.

Sete roldas e premios por categorías

A xornada comezará ás 10:30 horas coa apertura das inscricións. As primeiras partidas disputaranse ás 11:00, seguidas doutras dúas roldas ás 12:00 e ás 13:00 horas.

Tras o descanso, a competición retomarase ás 16:00 horas, con novas partidas ás 16:45, 17:30 e 18:15. Finalmente, ás 19:00 horas, celebrarase a entrega de premios.

Cada partida seguirá o sistema suízo, cun tempo de 15 minutos por xogador e cinco segundos adicionais por movemento.

Os tres primeiros clasificados de cada categoría recibirán un trofeo. Ademais, durante a clausura sortearanse cinco vales para unha pizza na Pizzería Carlos de Narón.

Inscricións e participación

Para participar, as persoas interesadas poden escribir ao correo xoanrei@gmail.com ou chamar ao teléfono 655 796 421.

Quen non dispoña de licenza federativa poderá obtela gratuitamente a través da organización. Neste caso, será necesario achegar unha copia do DNI polas dúas caras ou do libro de familia.

Toda a información sobre a competición pode consultarse nas páxinas xadrezferrola.gal e info64.org.