Narración oral e teatro infantil esta semana en Narón
Sabela Arredondo García | 20/10/2026
Historias da tradición oral galega e unha aventura infantil arredor dos libros protagonizarán as próximas actividades da Biblioteca Pública Municipal de Narón, que continúa coa súa programación especial de outubro.
Con motivo do Día das Bibliotecas, celebrado o 24 de outubro, o espazo acollerá dúas propostas para diferentes idades: un espectáculo de narración oral inspirado na cultura popular e unha función teatral para familias.
«A corva», historias da tradición oral
Este venres 23 de outubro, ás 19:30 horas, a narradora Cristina Collazo presentará A corva, un espectáculo dirixido ao público xuvenil e adulto.
Inspirada na figura de Carmen Montoiro, unha compoñedora de ósos dunha pequena vila da Estrada, a proposta recupera cantos e relatos da tradición oral galega nunha sesión interactiva na que tamén poderá participar o público.
A temática, relacionada co encontro entre o mundo das persoas vivas e o das mortas, conecta co ambiente das datas próximas ao Samaín.
A entrada será libre ata completar a capacidade da sala.
Unha aventura infantil para o Día das Bibliotecas
Xa o sábado 24 de outubro, ás 11:00 horas, Trémola Teatro representará A nena que comía todos os libros, unha historia protagonizada por un personaxe que, na súa procura por converterse na persoa máis lista do mundo, decide comer libros en lugar de lelos.
Pensada para nenas e nenos a partir de 3 anos e as súas familias, a actividade require inscrición previa.
As reservas poderán realizarse desde o martes 20 de outubro, presencialmente na Biblioteca Municipal de Narón ou chamando ao 981 382 173, en horario de apertura.
Para participar, os menores deberán ter os tres anos cumpridos e dispoñer do carné da rede de bibliotecas sen sancións pendentes.