Ares abre as inscricións de «Envellecendo en Ares»

Sabela Arredondo García| 04/09/2026

Memoria, novas tecnoloxías, música e lectoescritura forman parte da nova edición de «Envellecendo en Ares», o programa de actividades para persoas maiores que se desenvolverá durante o curso 2026/2027.

Catro obradoiros compoñen a programación deste ano: Memoria, Smartphones, «A música que nos move» e Lectoescritura. As actividades repartiranse por diferentes espazos de Ares, Cervás e Redes, co obxectivo de favorecer un envellecemento activo e crear oportunidades de aprendizaxe e socialización.

As inscricións abrirán de maneira escalonada segundo a actividade. Memoria será a primeira en admitir solicitudes, desde o 8 de setembro; Lectoescritura farao o día 9; Smartphones, o 10; e «A música que nos move», o 11 de setembro.

En todos os casos, o prazo permanecerá aberto ata o 25 de setembro, sempre que queden prazas dispoñibles. A adxudicación realizarase por rigorosa orde de inscrición.

Para apuntarse será necesario acudir presencialmente ao Departamento de Servizos Sociais, entre as 10:00 e as 13:00 horas.