Narón abre 15 prazas para formarse en hostalaría
Sabela Arredondo García| 22/08/2026
Quince persoas desempregadas poderán acceder en Narón a unha nova formación en servizos básicos de restaurante e bar, orientada a adquirir coñecementos e experiencia profesional no sector da hostalaría.
O prazo para solicitar unha das prazas abrirá o 25 de agosto ás 8:30 horas e permanecerá dispoñible ata o 31 de agosto ás 13:00 horas. A selección realizarase por rigorosa orde de inscrición, cun 20 % das prazas reservadas para persoas derivadas do Servizo Sociocomunitario.
Impartido entre o 7 de setembro e o 4 de decembro, o curso terá como sede o Centro Municipal de Formación Irmás Froilaz, na Gándara, ademais de empresas colaboradoras nas que se desenvolverá a parte práctica.
En total, o programa inclúe 350 horas de formación, 15 horas de módulos transversais e 100 horas de prácticas profesionais non laborais en empresas de hostalaría.
Hixiene e seguridade alimentaria, prevención de riscos laborais, atención ao cliente, servizo de alimentos e bebidas, limpeza ou manexo de equipos e menaxe forman parte dos contidos. Tamén se traballarán materias relacionadas coa orientación laboral, igualdade, medio ambiente, emprendemento e novas tecnoloxías.
Para participar será necesario ter 18 anos ou máis, estar en situación de desemprego e figurar no padrón de Narón. Se quedan vacantes, tamén poderán acceder persoas doutros municipios. Quedan excluídas aquelas que estean matriculadas noutro curso municipal coincidente ou que xa superasen anteriormente esta mesma formación.
As solicitudes poderán tramitarse no Rexistro Xeral do Concello de Narón, a través da Sede Electrónica ou mediante os medios previstos legalmente.
Para resolver dúbidas ou ampliar información, está dispoñible o Centro Municipal de Formación no teléfono 981 33 31 35.